పనికిరాని వార్తలు
పతాక శీర్షికలై తళుకులీనుతున్నవి
బట్టబయలు కావలసిన వార్తలు
బుట్ట దాఖలవుతున్నవి
పత్రికల కంటే కరపత్రాలే నయం
మీడియా ప్రయాణం ప్రహసనమవుతున్నది
అసంబద్ధ చర్చలు
అనవసర రాద్ధాంతాలు
మాట్లాడాల్సిన అంశాలన్నీ మరుగు పరిచి
ఎక్స్క్లూజివ్ పేరా కాలయాపన చేస్తూ
టీఆర్పీల ఉచ్చులో చిక్కి
ఉరి బిగించుకున్న మైకు గొంతులు
కాలనేత్రమై వెలిగాల్సిన కెమెరా కన్ను
కుహన రాజకీయ కుతంత్రంలో
కూలుతున్నదా? కుములుతున్నదా?
లేక కులుకుతున్నదా?
ఆస్తులపై ఆకలితో ఆత్మను అమ్ముకున్నదా?
యూట్యూబర్ల మనసుల్లో
దొంగలు పడ్డారా?
సామాజిక మాధ్యమాలు
భలే స్తబ్దుగున్నాయి ఎందుకు?
ప్రళయకాల పాలనేత్రుడై
ప్రభవించాల్సిన పాత్రికేయ రంగం
పుడమి పుత్రుల పాలిట
పక్షపాత వైఖరి న్యాయమా?
రామ ప్రాణ ప్రతిష్టకు జరిగిన ప్రచార పర్వం
రైతు పోరాటపథంలో కనబడటం లేదెందుకు?
పెట్టుబడిదారీ పంజరంలో చిలుకైందా? లేక
పాలకుల పాదాల వద్ద పావనమౌతుందా?
పాలను నీళ్లను వేరు చేసేది కదా పాత్రికేయం!
– డా.ఎడ్ల కల్లేశ్ 98667 65126