మనిషి పూర్ణాహుతి

అదొక
ఆధ్యాత్మిక శిక్షణా శిబిరం
బలవంతపు అనుమతులు
విగ్రహాలు చెక్కడం
యాగశాలల నిర్మాణం
వేదాల బట్టీయం
ఎన్నెన్నో తరగతులు
శిలలో తొలగించిన ముక్కలన్నీ
తాటాకుల మిగుళ్ళన్నీ
నత్తి మాటల అవ్యయాలన్నీ
మనం పోగుచేసుకొచ్చామా
ఆజ్యం రగులుకుంది
బహిష్కరణ వెలి నిషిద్ధం
అంటు ముట్టు మడి
సిద్ధాంతచర్చ జోరుగా
లోపలంతా దేవుడి వైభవం
పరిహారం శాంతి విరుగుడు
పాపం బలి మోక్షం
ధైర్యం మాటున దైవభీతి
పునశ్చరణ పాఠం
అవమానం చిన్నతనం
అగ్రహారం పరువుహత్య
తీర్మాన ఫర్మానా
అత్యాచారం దౌర్జన్యం
చెప్పుదెబ్బ కాలితన్ను
కన్నీటి కారుణ్యం
తప్పులన్నీ అతడి దృష్టి
శిక్షలన్నీ మనిషి సృష్టి
పశ్చాత్తాపమెరుగని పరమేష్టి
బయటంతా మానవ పరాభవం
మనిషిని నిలువునా చీల్చి
ముక్కల్ని ఏమార్చాలి
కడుపు కుండలో బాణం నాటాలి
చెట్టు చాటు నుంచి విషం చిమ్మాలి
నిద్రాభంగంతో చంపేయ్యాలి
వరాలకు శాపం వేషాలెయ్యాలి
అడుగడుగునా శిక్షణ
ఇంటింటా పూజాఫలం
మెదడుకో మంత్రపుష్పం
మనిషి పూర్ణాహుతి!

ప్రసేన్‌
9848997241