చేను గట్టుపై రైతు కష్టం
మెతుకులై సమస్తాన్ని బతికించాలి
రైతు లేని రాజ్యం
ఆకలి ఆర్తనాదాల హాహాకారాలేననే
నిజం తెలిసిరావాలి
గిట్టుబాటు లేనితనం వెనుక
గుట్టు చిట్టాను బయట పెట్టేలా
సరికొత్త అజెండా లిఖించబడాలి
మొక్క పోషణకై
ముప్పతిప్పలు పడే కాలం పోయి
సరసమైన ఎరువుల ధరలతో
ప్రతి మొక్కను బతికించాలి
చెట్టు చెట్టుకూ న్యాయం జరగాలి
రాజకీయపు చదరంగంలో
మెలికలు తిరిగే రైతన్న బతుకుని
అతుకులు లేని జీవనంగా సాగించాలి
రైతు వెన్నువిరిచే
పన్నాగాల పథకావిష్కరణలపైన
నిగ్గు తేల్చే నిజాన్ని ఎక్కుపెట్టాలి
రైతు లేనిదే మెతుకు లేదన్న సత్యం
ఆదమరచిన మనసుల్లోకి ఎక్కించాలి
గింజ గింజలో కర్షకుని స్వేదం
అణువణువునా నిండి వుందని
మదమెక్కిన బుర్రల్లోకి చొప్పించాలి
ఎండ వానలు వాగు వంకలు
చెట్టుపుట్ట గుట్టలోయల్ని లెక్కచేయని
రైతు కష్టం సమాజానికి ప్రాణవాయువని
ఆదమరచిన మనిషి చెవిన
గుణపాఠమై గుచ్చుకోవాలి
రెక్కలిరుచుకున్న కంకిని విదిల్చుతూ
ధాన్య సిరులను దేశానికి పంచే
రైతే రాజని మరోసారి గుర్తు చేయాలి
ఆరుగాలం పంటకు
ఆయువంతా పోసి కుప్ప ఊడ్చాక
నడ్డి విరిచే రేటు గునపమై పొడిచాక
కరువు కాటుతో రైతు జీవనం
మట్టికే అంకితమైపోయింది
రైతు జెండా గగన సీమలో
పచ్చదనంగా పరిణమించాలి
మట్టి మనిషి కష్టానికి
ఆపన్నహస్తం ముడుచుకున్నాక
కర్షకుని కష్టం బూడిదపాలయింది
ఇక ఆగి చూసే కాలం లేదు
రైతు పోరుకు సిద్ధమవ్వాలి
మట్టిని తడిపే చెమట చుక్కల సాక్షిగా
కీళ్ళు వంచి పనిచేసే రైతన్న సాక్షిగా
అరువు బరువును మోయలేక
అసువులు బాసిన కర్షకుని సాక్షిగా
పుస్తెలమ్మి పంటదీసే దీనత్వపు సాక్షిగా
రైతన్నకు లేకపాయే చేయూత
రైతే కదా.. పిడికెడు బువ్వకు సృష్టికర్త
రైతే కదా.. నాల్గు మెతుకులకు ధర్మకర్త
రైతును బతికించాలి
రైతును జీవింపజేయాలి
వ్యవస్థను ఆకలి కరువు నుంచి
శాశ్వతంగా దూరం చేయాలి
నరెద్దుల రాజారెడ్డి
9666016636
