– సమ్మె శిబిరాల్లో పిండివంటలతో నిరసనలు
– కొనసాగిన కోటి సంతకాల సేకరణ
– 34వ రోజూ అంగన్వాడీల సమ్మె
– పోరాటానికి ప్రజాసంఘాల సంఘీభావ నిధి
ప్రజాశక్తి – యంత్రాంగం:వేతనాలు పెంపు, గ్రాట్యుటీ అమలుపై పోరాడుతున్న అంగన్వాడీలపై రాష్ట్ర ప్రభుత్వం కర్కశంగా ఎస్మా విధించి సంజాయిషీ నోటీసులు ఇవ్వడాన్ని వ్యతిరేకిస్తూ సమ్మె శిబిరాల్లో భోగి మంటలు వేసి ఆ ప్రతులను దగ్ధం చేశారు. పిండివంటలు చేసి తమ నిరసనను కొనసాగించారు. అలాగే కోటి సంతకాల కార్యక్రమాన్ని కొనసాగించారు. తమ సమస్యలు పరిష్కరించే వరకూ సమ్మె విరమించేది లేదని, ప్రభుత్వం స్పందించకపోతే ఉద్యమం మరింత ఉధృతం చేస్తామని హెచ్చరించారు. ఐదుసార్లు అంగన్వాడీ యూనియన్ నాయకులను చర్చలకు ఆహ్వానించినప్పటికీ సమస్యల పరిష్కారానికి ప్రభుత్వ ప్రతినిధులు సుముఖతను తెలియజేయకపోవడం దారుణమన్నారు. పోరాటానికి ప్రజాసంఘాలు, యుటిఎఫ్‌ నాయకులు సంఘీభావ నిధిని అందించారు.గుంటూరు కలెక్టరేట్ ఎదుట భోగి మంటలు వేసి ఎస్మా జిఒ-2 ప్రతులను దగ్ధం చేశారు. తాడికొండ, తుళ్లూరు శిబిరాలను ఐద్వా రాష్ట్ర ప్రధాన కార్యదర్శి డి.రమాదేవి సందర్శించి మాట్లాడారు. ఎస్మా జిఒలను భోగిమంటల్లో దగ్ధం చేశారు. రమాదేవి మాట్లాడుతూ.. ప్రభుత్వం ఇస్తున్న నోటీసులు తాటాకు చప్పుళ్లతో సమానమని, వాటికి బెదిరిపోవడం లేదన్నారు. అంగన్వాడీ కేంద్రాలకు నాణ్యమైన సరుకులు సరఫరా చేయడం చేతగాని రాష్ట్ర ప్రభుత్వం ఆ నెపాన్ని అంగన్వాడీలపై వేస్తోందని మండిపడ్డారు. డిమాండ్లను అంగీకరించకుంటే నిరవధిక దీక్షలకూ వెనకాడబోరని హెచ్చరించారు. చేబ్రోలులో సమ్మె శిబిరాన్ని యుటిఎఫ్‌ నాయకులు సందర్శించి పోరాట సంఘీభావ నిధికి రూ.మూడు వేలు అందించారు. పల్నాడు జిల్లా కేంద్రమైన నరసరావుపేటలోని సమ్మె శిబిరం వద్ద కోటి సంతకాల సేకరణ చేపట్టారు. అంగన్‌వాడీలకు మద్దతుగా కరపత్రాలను ముద్రించి కౌలు రైతు, ఇతర ప్రజా సంఘాల ఆధ్వర్యంలో చిలకలూరిపేట మండలంలోని పలు గ్రామాల్లో ప్రచారం చేశారు.విశాఖలోని జివిఎంసి గాంధీ విగ్రహం వద్ద ఖాళీ గిన్నెలు, కంచాలతో మోత మోగిస్తూ పెద్ద ఎత్తున నినాదాలు చేశారు. విశాఖ జిల్లా పెందుర్తి, అనకాపల్లి జిల్లా చీడికాడ, మునగపాక, పరవాడలో భోగి మంటల్లో జిఒ-2 ప్రతులను దగ్ధం చేశారు. అల్లూరి జిల్లా విఆర్‌.పురంలో సమ్మె శిబిరం వద్ద నిరసన తెలిపారు. అంబేద్కర్‌ కోనసీమ జిల్లా అమలాపురం, మండపేట, ముమ్మిడివరం, మామిడికుదురు, కాకినాడ జిల్లా కేంద్రమైన కాకినాడతోపాటు, పెద్దాపురం, జగ్గంపేట రూరల్‌, కిర్లంపూడి, కరప మండలాల్లోని సమ్మె శిబిరాల వద్ద భోగి మంటలు వేసి ఎస్మా ప్రతులను దగ్ధం చేశారు. తూర్పు గోదావరి జిల్లా దేవరపల్లిలో హరిదాసు వేషధారణతో నిరసన తెలిపారు.కర్నూలు ధర్నా చౌక్‌లో నోటికి రిబ్బన్లు కట్టుకుని నిరసన దీక్షలు చేపట్టారు. నంద్యాలలో ఎస్మా ప్రతులను భోగి మంటల్లో దగ్ధం చేశారు. ముఖ్యమంత్రి, మంత్రి బత్స సత్యనారాయణ, ప్రభుత్వ సలహాదారు సజ్జల చిత్రపటాలను భోగి మంటల్లో వేసి దగ్ధం చేసి నిరసన తెలిపారు. కడప, అన్నమయ్య జిల్లాల కలెక్టరేట్ల ఎదుట చేపట్టిన రిలే నిరాహార దీక్షలు కొనసాగుతున్నాయి. అక్కడే దోశలు వేసుకుని, తిని వినూత్నంగా నిరసన తెలియజేశారు. ఒంగోలు కలెక్టరేట్ వద్ద ఎస్మా జిఒలు, సంజాయిషీ నోటీసులను భోగి మంటల్లో వేసి దగ్ధం చేశారు. బాపట్లలో కోటి సంతకాల సేకరణ చేపట్టారు. అనంతపురం, శ్రీసత్యసాయి జిల్లాల వ్యాప్తంగా ఎస్మా ప్రతులను భోగి మంటల్లో వేసి దగ్ధం చేశారు.చిత్తూరు జిల్లాలోని కుప్పం, నగరి, కార్వేటినగరం, పలమనేరు, శాంతిపురం, బైరెడ్డిపల్లిలో ఐసిడిఎస్ ప్రాజెక్టు కార్యాలయాల వద్ద నోటీసులను దగ్ధం చేసి నిరసన తెలిపారు. తిరుపతి పాత మున్సిపల్‌ కార్యాలయం కోటి సంతకాల సేకరణ కార్యక్రమాన్ని చేపట్టారు. పుత్తూరులో మట్టి తింటూ నిరసన తెలిపారు. నెల్లూరు కలెక్టరేట్ ఎదుట చేపట్టిన రిలే దీక్షల్లో నగర పరిధిలోని కార్యకర్తలు, హెల్పర్స్ కూర్చున్నారు. ఉమ్మడి పశ్చిమగోదావరి, కృష్ణా, విజయనగరం, శ్రీకాకుళం జిల్లా వ్యాప్తంగా బోగి మంటల్లో ఎస్మా ప్రతులను వేసి దగ్ధం చేశారు. పొందూరు, కోటబమ్మాళిలో కోటి సంతకాల సేకరణ నిర్వహించారు.
ఎస్మా చట్టం ప్రతులు, సోకాజ్ నోటీసులు భోగి మంటల్లో దగ్ధం చేసిన అంగన్వాడీలు.
అంగన్వాడీల సమస్యలు పరిష్కరించమంటూ గాంధీ విగ్రహం వద్ద నిరసన.
రాజమండ్రి : అంగన్వాడీలపై ఈనెల ఆరో తేదీన రాష్ట్ర ప్రభుత్వం ప్రయోగించిన ఎస్మ చట్టం ప్రతులను, అంగన్వాడీ లను విధులనుంచి తొలగిస్తామంటూ ఇచ్చిన సోకజ్ నోటీసులను అంగన్వాడి వర్కర్లు హెల్పర్లు ఆదివారం రాజమండ్రిలో స్థానిక జాంపేట వద్ద భోగిమంటల్లో వేసి తగలబెట్టారు. అనంతరం జాంపేట సెంటర్లో గల గాంధీ విగ్రహం వరకు ర్యాలీగా వెళ్లి గాంధీ విగ్రహం వద్ద రాష్ట్ర ప్రభుత్వం అంగన్వాడీల పట్ల వ్యవహరిస్తున్న తీరు పై నిరసన తెలిపారు. ఈ సందర్భంగా సిఐటియు జిల్లా ప్రధాన కార్యదర్శి బి రాజులోవ, సిఐటియు జిల్లా కమిటీ సభ్యులు బి.పవన్, ఏపీ అంగన్వాడి వర్కర్స్ అండ్ హెల్పర్స్ యూనియన్ రాజమండ్రి ప్రజక్ట్ అధ్యక్ష కార్యదర్శులు కె.శారద, జె. సునీత మాట్లాడుతూ రాష్ట్ర ప్రభుత్వం అంగన్వాడీల పట్ల దుర్మార్గంగా వ్యవహరిస్తుందని, ఇప్పటివరకు ఆరుసార్లు చర్చలు జరిపిన, ఐసిడిఎస్ మంత్రి గాని,ముఖ్యమంత్రి గాని, చర్చలకు రాలేదని, కేవలం సలహాదారులతో మాత్రమే చర్చలు చేస్తుందని అన్నారు. గతంలో ఎంతో మంది ముఖ్యమంత్రులు కార్మిక ఉద్యోగ సంఘాల ప్రతినిధులతో నేరుగా చర్చలు జరిపి సమస్యలు పరిష్కారానికి చొరవ చూపారని, ప్రస్తుతం ఆంధ్రప్రదేశ్ ముఖ్యమంత్రి జగన్మోహన్ రెడ్డి 33 రోజులుగా నిరవధిక సమ్మెలో లక్ష మంది పైబడి అంగన్వాడీలు ఉన్న ఒక్కరోజు కూడా యూనియన్ నాయకులతో చర్చలు జరిపే తీరిక లేకపోవడం సోషనీయమన్నారు. జగన్మోహన్ రెడ్డి గారు తండ్రి అయిన రాజశేఖర్ రెడ్డి గారి సైతం ఎన్నో సందర్భాల్లో వివిధ సంఘాల నాయకులతో చర్చలు జరిపి సమస్యలు పరిష్కారానికి చొరవ చూపారని, ఆయన వారసుడైన జగన్ మోహన్ రెడ్డి అందుకు భిన్నంగా వ్యవహరించడం ఆశ్చర్యాన్ని కలిగిస్తుంది అన్నారు. ఐదేళ్లకోసారే వేతనాలు పెంచుతామనడం సరికాదని, ప్రజలపై అనేక భారాల మోపి వేతనాలు పెంచమంటే ఎప్పుడు పెంచుతాము ఎంత పెంచుతామో చెప్పకుండా సమ్మె విరమించమనడం, బెదిరింపులకు పాల్పడడం, ఎస్మా ప్రయోగించడం, ఉద్యోగం నుంచి తొలగిస్తే శివకాశి నోటీసులు ఇవ్వడం వంటి చర్యలను పూర్తిగా వ్యతిరేకిస్తున్నామని అన్నారు. గ్రాడ్యుటీ అమలు చేయాలని సుప్రీంకోర్టు తీర్పు చేప్పినా రాష్ట్ర ప్రభుత్వం ఎందుకు అమలు చేయదని ప్రశ్నించారు. రాష్ట్ర ప్రభుత్వ ఇప్పటికైనా అంగన్వాడీ న్యాయమైన సమస్యలు పరిష్కరించాలని లేకుంటే రాష్ట్రంలో ఉన్న కొట్లాదిమంది ప్రజల మద్దతు కూడగట్టి ఈ ప్రభుత్వ విధానానికి వ్యతిరేకంగా పెద్ద ఎత్తున ఉద్యమిస్తామని హెచ్చరించారు. ఈ కార్యక్రమంలో ఏపీ అంగన్వాడీ వర్కర్స్ అండ్ హెల్పర్స్ యూనియన్ నాయకులు స్రవంతి,పద్మ, దేవి, తాయారు, లక్ష్మి తదితరులు పాల్గొన్నారు.
కలెక్టరేట్ ఎదుట అంగన్వాడీల భోగి మంటలు..
కోనసీమ : సమస్యల పరిష్కారం కోరుతూ అంగన్వాడీలు చేపట్టిన నిరవధిక సమ్మె ఆదివారం నాటికి 34వ రోజుకు చేరుకుంది. కలెక్టరేట్ ఎదుట అంగన్వాడీలు భోగి మంటలు వేసి రాష్ట్ర ప్రభుత్వ తీరును నిరసిస్తూ నినాదాలు చేశారు. సీఎం జగన్ తమను ప్రధాన పండుగలకు దూరం చేశారని ఆవేదన వ్యక్తం చేశారు. కార్యక్రమంలో కారెం వెంకటేశ్వరరావు, పి.అమూల్య, విజయ సుబ్బలక్ష్మి పరిపూర్ణ పార్వతి రుక్మిణి తదితరులు పాల్గొన్నారు.
మద్దతు తెలుపు%
