కరువును బాపే తరువును నేను
కల్పతరువై నీకు వరములిస్తాను
నరికినా నేను చిగురించుతూనే
బతుకుపై ఆశను కల్పించుతాను
మొలకనై నేను మురిపించుతాను
వృక్షమై నేను రక్షించుతాను
వైవిధ్యానికి ఆలంబనై నేను
జీవులన్నింటికీ బతుకునిస్తాను
అమ్మ చేత పాల బువ్వనౌతాను
నాన్న చేత కీలుగుర్రమౌతాను
అన్నయ్య చేతిలో వేణువై నేను
పాటనై నిన్నెప్పుడు పలకరిస్తాను
పొలమును దున్నగా నాగలౌతాను
రోగాలు బాపగా మందునౌతాను
కనువిందు చేసే పువ్వులుగ మారి
కడుపాకలి తీర్చే గింజలౌతాను
చల్లనీ గాలితో పలకరిస్తాను
పక్షులను ప్రేమగా సాకుతుంటాను
కొండకోనల్లో జంతుజాలాన్ని
కంటికి రెప్పలా కాపాడతాను
కరువును బాపే తరువును నేను
కల్పతరువై నీకు వరములిస్తాను! – రావిపల్లి వాసుదేవరావు,విజయనగరం, 94417 13136.