నయా నాయకులు

ఎన్నికలు రాగానే
ప్రజలే మాకు దేవుళ్ళంటారు
ఎన్నికలవగానే మా నాయకుడే
మాకు దేవుడంటారు
అడవి మన సంపదంటారు
అధికారం రాగానే అడ్డగోలుగా దోచేస్తారు
నదులకి హారతులిస్తారు
నదిలోని ఇసుకను తోడేస్తారు
ప్రజలకు సేవ చేయటం కోసమే
రాజకీయాల్లోకి వచ్చామంటారు
కానీ, శవాలతో రాజకీయం చేస్తారు

ఓటుని నోటుతో కొని అందలమెక్కుతారు
పేదరికాన్ని రూపుమాపుతామంటారు
మార్పు మొదలైందంటారు
మసిపూసి మారేడుకాయ చేస్తారు
మతాల పేరుతో మంటలు రేపుతారు
కులాల పేరుతో కుట్రలు పన్నుతారు
ప్రజలను కళ్ళున్నా గుడ్డివాళ్ళని చేస్తారు

అన్నీ ఉచితమంటారు
అందల మెక్కగానే
నిత్యావసర ధరలు పెంచుతారు
కరెంటు ఛార్జీలు పెంచుతారు
పెట్రోల్‌ రేట్లు పెంచుతారు
పెంచిన రేట్లతో సామాన్యుల నడ్డి విరగ్గొడతారు

ఐదేళ్లకొకసారి వచ్చే
ఈ ఎన్నికల సమరంలో
అభివృద్ధికి ఓటెయ్యాలో
నీతికి ఓటెయ్యాలో
అవినీతికి ఓటెయ్యాలో
అంతిమ నిర్ణయం ప్రజలదే!
నిర్ణయించేది ఈరోజే!
– కోనేటి నరేష్‌,
84998 47863