చీకట్లను చీల్చుతూ
కన్నీళ్ళు కార్చే కనులు
వెలుగులను ఏ సూర్యుళ్ళ నుంచో మింగి
కావల్సినప్పుడల్లా కారుమబ్బులను
వెలికి తీస్తాయి ఆశ్చర్యంగా..!
కొంచెం తమాయింపు తొడుక్కొని
పదే పదే సుడులు సుడులుగా
వ్యథలను కెరటాల రూపంలో
ఎద తీరానికి ఎత్తి కొడుతూ పోటెత్తుతాయి..!!
ఒకానొకరోజు- ఇంకిపోయిన లోతుల్లోంచి
కొన్ని ఇంకు చుక్కలు కానవస్తాయి!
మిత్రమా బాధలు అందరికీ నొప్పినిస్తాయ్
కొందరిని వెంటాడి, వేధించి నలిపేస్తాయ్
దుఃఖం మోడుబారిపోతుంది ఏడ్చీ ఏడ్చీ..!
అనుకుంటాం ఇంకేం మిగిలిందని ఇంతకన్నా…
అనుభవించడానికి ఆవిరైన అడవి తప్పా..!!
ఇక ఏ భావమూ తొణికిసలాడక
దిక్కులూ దిశలూ మమేకమై, తటస్థమై
జడత్వాన్ని కప్పుకొని గుర్రుపెట్టి నిద్రపోయి
ఏ ధూళికణాల్లోనో..
కలిసిపోయినట్టు కనిపించినా-
విప్లవాత్మక కిరణాలకు అస్థిత్వాన్ని పొదుగుతాయి
అవే రేపటికి ఆసన్న భుజాలవుతాయి
దిగులు గుబులును నిర్వీర్యంగాంచుతాయి!!
- రవీర్, 9603245215