పని ప్రదేశంలో మహిళలు అనేక రకాల వేధింపులకు గురవుతున్నారు. ఇటీవల అంతర్జాతీయ కార్మిక సంస్థ (ఐఎల్‌ఓ) విడుదల చేసిన వృత్తిపరమైన రక్షణ, ఆరోగ్యం నివేదిక పని ప్రదేశంలో మహిళలు ఎదుర్కొంటున్న హింస, వేధింపులను ఎత్తిచూపింది. ఉపాధిలో ఉన్న ప్రతి ఐదుగురిలో ఒకరు హింస, వేధింపులకు గురవుతున్నట్లు తెలిపింది. ప్రయాణాలు, పర్యటనలు, ఈవెంట్లు, డిజిటల్‌ కమ్యూనికేషన్‌, సామాజిక కార్యకలాపాలు, ఐ.టి ఆధారిత కార్యాలయాల సంబంధిత రంగాలలో ఈ సమస్య ఉందని నొక్కి చెప్పింది. పని ప్రదేశంలో…మౌఖిక, దృశ్య, శారీరక వేధింపులు మొత్తం సంస్థకు హానికరమైన ప్రభావాలను కలిగించే తీవ్రమైన సమస్య. కార్యాలయంలో శారీరక వేధింపులు ఉద్యోగులపై తీవ్రమైన ప్రభావాన్ని చూపుతాయి. ఇది ప్రతికూలమైన పని వాతావరణాన్ని సృష్టించి నైతికత తగ్గడానికి దారితీయడమే కాకుండా ఉద్యోగులలో అధిక స్థాయి ఒత్తిడి, ఆందోళనకు దారితీస్తుంది. శారీరక వేధింపులు ఉత్పాదకత తగ్గడానికి దారితీయవచ్చు. దీర్ఘకాలిక శారీరక లేదా మానసిక నష్టానికి కూడా దారితీయవచ్చు. సంస్థలు లైంగిక వేధింపులను తీవ్రంగా పరిగణించడం, వాటిని తగిన విధంగా పరిష్కరించడానికి విధానాలను కలిగి ఉండటం చాలా ముఖ్యం.
– జనక మోహనరావు దుంగ,
అధ్యాపకుడు, శ్రీకాకుళం.
