నాటి బాల్యం

కోడికూత గోలలోన
చుక్క పొద్దుయాలలేసి
చద్దిబువ్వ చంకనేసి
సాలుపోయ కదిలాము

పేడ పిడక మంటలోన
చలి మంటలు కాగాము
ఊబిలోన నీరు తాగి
ఊసులెన్నో చేశాము

ఈతమట్ట చేతబూని
గేదెనంత తోమాము
గెచ్చి కొట్టి గుర్రమెక్కి
దున్నపోతు తోలాము

బొంగరాల ఆటలోన
గింగిరాలు తిరిగాము
ఉంగరాల జుట్టు కొరకు
రింగులెన్నో తిప్పాము

వాన నీటి జాడిలోన
ఓడలెన్నో వదిలాము
రోత పుట్టి రోవ చేస్తే
రక్కి రక్కి విసిగాము

ఇసుకలోన ఈతగింజ
మొలకలెన్నో తిన్నాము
ఈత కొరకు ఊరు చుట్టు
చెరువులెన్నో ఈదాము

ఇరవై ఎక్కాలు వస్తే
ఐనస్టీన్‌ అయ్యాము
ఏ బీ సీ డీలు వస్తే
ఎదురే లేదన్నాము

పొద్దు వాలారాగానే
ఆటలెన్నో ఆడాము
బుద్దిలేక ఇద్ధిమరచి
బాసలెన్నో చేసాము

పండగేల సోడితోప
జుర్రుకొని తిన్నాము
ఉన్నవాడు లేనివాడు
కలసి మెలసి బతికాము

చల్లంబలి తాగిన
చల్లగానే బతికాము
చిల్లిగవ్వ లేకున్నా
చేయి చేయి కలిపాము

– వినోద్‌ కుత్తుం,పలాస, శ్రీకాకుళం జిల్లా
9634314502