తనువు ఉన్నాళ్ళు కూటికి
తనువు చాలించాక కాటికి
అంతమాత్రానికే ఎందుకు భేషజాలు ?
మౌనం ఆభరణమైతే
మాట తీరు అలంకారమైతే
ఇంకెందుకు విషపు ఆలోచనా బీజాలు ?
కష్టం నీకు ఇష్టమైతే
విజయం నీ స్వంతమైతే
నీకెందుకు ఈర్ష్యద్వేషాలు ?
కీర్తి కోసం పాకులాడక
స్ఫూర్తి కోసం పాటుపడితే
విమర్శలకు ఎందుకు రోషాలు ?
అందరూ బాగుండాలని
అందులో మనముండాలని
అనుకుంటే ఎక్కడది ఆత్మవంచన ?
ప్రేమించే మనసుంటే
ఆదరించే గుణముంటే
వృద్ధాప్యం చేరునా ఆశ్రమం పంచన ?
వినయం నీ వెంటుంటే
విజ్ఞత నీ చెంతుంటే
తలకెక్కినా కాదా గర్వభంగం ?
మహిళను పూజిస్తే
అమ్మని నీవు భావిస్తే
జరుగునా అతివలపై మానభంగం ?
మార్చుకుంటే ప్రవర్తన
నడచుకుంటే సత్ప్రవర్తన
జరగదా నేటి సమాజం పరివర్తన ?
– కయ్యూరు బాలసుబ్రమణ్యంసెల్ : 7780277240